Leikskólamál

Eins og þið vitið fluttum við fjölskyldan í Kópavoginn þann 1.júní.  Um leið og við höfðum gert kauptilboð sótti ég um leikskólapláss fyrir Ragnar Fannberg hjá Kópavogsbæ, frá og með 1. ágúst n.k.  Þegar við vorum flutt, hringdi ég í leikskólafulltrúa til að kanna stöðuna og hún sagði að hann kæmist pottþétt inn á leikskóla, ég myndi fá bréf um málið fljótlega.  Það stóð heima og bréfið um að Ragnar kæmist inn á leikskóla kom´nokkrum dögum síðar.  Í bréfinu stóð að Ragnar hefði fengið pláss og að ég ætti að staðfesta það við leikskólastjóra viðkomandi leikskóla.  Ég var himinlifandi og hafði strax samband.  Leikskólastjórinn var hins vegar mjög loðinn í tilsvörum og sagðist ekki lofa neinu, barnið kæmist a.m.k. ekki inn í leikskólann 1. ágúst og sennilega ekki fyrr en í fyrsta lagi í september og kannski ekki þá!  Leikskólinn ætti við vanda að stríða í starfsmannamálum og verið væri að auglýsa grimmt eftir fólki.  Nú voru góð ráð dýr......  Ég mátti hringja aftur í byrjun júlí.

Þegar ég hringdi aftur í byrjun júlí var alveg sama sagan og síðast, hún gat engu lofað mér og ekkert sagt.  Þar sem ég á að byrja að vinna á nýjum vinnustað 18. ágúst fannst mér þetta ekki gott mál.  Ekki gæti ég hringt og tilkynnt forföll fram í september, eða lengur, vegna þess að ég fengi ekki pössun fyrir barnið mitt fyrr.  Ég ákvað að hafa aftur samband við leikskólafulltrúann hjá Kópavogsbæ og sagði henni hvernig í málinu lægi.  Þar sem það eru tveir leikskólar hér í hverfinu, báðir í um 5 mín. fjarlægð frá húsinu okkar, bauðst hún til að kanna málið á hinum leikskólanum.  Þegar hún hringdi aftur sagðist hún hafa rætt við leikskólastjórann á hinum leikskólanum og ég mætti hafa samband þangað í lok júlí og hann kæmist pottþétt inn þar og jafnvel fljótlega eftir fríið.

 Ég skil ekki alveg hvers vegna bréf um staðfestingu á leikskólavist eru send út til fólks,án þess að börnin séu komin með fasta og dagsetta vistun.  En ég vil hrósa leikskólafulltrúanum fyrir að vera mjög liðleg, taka erindi mínu vel og sýna mér skilning auk þess að gera allt sem hún gat til að liðka fyrir málinu.   Nú hringi ég í lok júlí og ætla rétt að vona að ég fá gleðifréttir, enda held ég að sonur minn verði orðinn þreyttur á að leika ,,bara" við mömmu í allt sumar, þó hún sé ofsalega skemmtileg

Kveðja til ykkar allra

Guðbjörg

Athugasemdir

[Sigurrós (IP-tala skráð) 15.7.2008 kl. 00:33]

"Í leikskóla er gaman" eins og blessað barnið söng hér um daginn ;) Vonandi gengur þetta upp eins og búið er að lofa þér, þetta er meira ófremdarástandið í daggæslumálum. Ég er alveg sammála að ég sé engan tilgang í að senda fólki bréf til að segja því að barnið þeirra sé komið með pláss... "sko, einhvern tímann, bara ekki strax...!" Mér fyndist alla vega skárra að fá bréfið seinna og vera þá pottþétt komin með pláss.